أولاً إليك هذه الهدية ثم بعد أن تقرأ القصيدة قل آمين لي ولك
رحلة للحج
لي ارض الحجاز ودينا يا سايق البابور قوم بينا
يا رب يا كريييم ليك عقدت النية
يا رافع القدم رضاك معاه مشيئة
ناوية مع الحجيج لا واسطة ولا وصية
ما بملك ريال لا دولار لا وقية
كان قِبلت دعاي الحجة تكون هدية
تسهل لي الطريق أقوم صباح باكرية
أودع الجيران الأهل والذرية
.......
أسافر مع ضيوفك نفوسنا طيبة رضية
نصل بورسودان الشوق خلاص فاض بيه
ياسايق البابور قوم بينا
عجل قووم سريع ودينا
في البحر الكبير خوض بينا
تركنا الدنيا لي اهلنا نسينا
بيوت وأثاث الفرش والزينة
................
الإحرام هناك راجينا ... متين نصل للبيت تشوفه عينينا
ياسايق البابور قوم بينا
وصلنا المينا مع الحِبان
من هناك أحرمنا كمان
فجر مرقنا مع الأذان
ركبنا الباص القليب فرحان
اللسان يذكر يلبي للرحمن
المشوار طويل مافي زول تعبان
وصلنا البيت بكل امان ..
نحن ضيوفك يارحمن
اقبل التوبة وجدد الإيمان ..... لي احبابك إتقبل ياحنان
ياسايق البابور قوم بينا
بالبيت العظيم طفنا صلينا
قبلنا الحجر علي سنة نبينا
من زمزم شربنا من عطشنا روينا
زالت الألأم مرضنا منه شفينا
بين الصفا والمروة نحن سعينا
وفي منى عصير للرحال حطينا
عدينا ليلنا هناك ولي عرفة مشينا
يوم الحج الكبير فيه إتساوينا
إستغفرنا كتير ولي أهلنا دعينا .... في مزدلفة مع المغيب جمعنا صلينا
ياسايق البابور قوم بينا
جينا صباح العقبة ليها رمينا
طفنا الإفاضة للشعر قصينا
ضبحنا خروفنا ومنه هدينا
إتحللنا خلاص للإحرام ختينا
ما متعجلين تلاتة يوم قضينا ..... من الذنوب نحن خلاص خفينا
ياسايق البابور قوم بينا
رجعنا للوداع وطفنا تاني
ماآخر وداع نجيك يالحرم تاني
خلاص قاصدين النبي العدناني
نسلم عليه الجانا بالقرآن
الشوق يالرسول ملى وجداني
إتحقق مناي تِقل ميزاني ..... وقضت الأيام كأنها ثواني
ياسايق البابور قوم بينا
كل سنة يا لله لي بيتك من الزوار
تعفاني والمعاي من مرض الأبقار
لا كوليرا لا سحائي ولا زكام أطيار
لا عدوى خنزير لا خبيثاً ضار
الحاضرين معاي الصغار وكبار ...... الأهل والأقارب الصديق والجار
ياسايق البابور قوم بينا
