ما تغرك الدنيا وزينتها الفانية
أسعى للآخرة هي الحياة الباقية
عيشتها هادية
إن ترفض الدنيا تجيك بي خيرا
من نعيما إستغنى مولاك إديك غيرا
ونفسك تكون راضية
نعيما ده الفاني ما يحيرك تاني
كان تطلبها تعاني وتبقى ولهان
ومنك تكون جارية
نفسك الهايمة طول الليل نايمة
لا طايعة لا قايمة ذكرها قول ليها
قيامتا قايمة
أخويا وصاني كلامه بكاني
للدنيا نساني للآخرة شداني
دي الصُحبة الغالية
قال لي يوم موتك قيامتك قامت
تندم علي نومك والصلاة الفاتت
تاني إيه راجية
قوم انعل الشيطان صلي للرحمن
ما تبقى زول كسلان غسل الادران
لي جنةِ عالية
يا النايم ليك سنين ماشبعت منو دحين
داير تنوم لي متين مغمض العينين
الحياة ثانية
خايف عليك تنوم تلقاه تم اليوم
لاتقدر إنت تقوم لي صلاة لا صوم
والناس عليك باكية
مُستعجلين غسلوك بالحنوط عطروك
للكفن لبسوك ربطوك ودمدموك
زايلة دي الفانية
البحبوك شالوك للقبر وصلوك
في اللحد رقدوك بالتراب ردموك
راجعة مِي فاضية
ودعت الأهل والمال يا ربِ كيف الحال
بقت معاك الاعمال البتجاوب السؤال
مافي رجعة ليك تانية
ليست هناك تعليقات:
إرسال تعليق